MAKALA

Maalim Idriss ameacha misingi bora ya maisha ya dini ya kiislamu

ZANZIBAR ni moja ya nchi maarufu ambayo iliyotoa walimu, masheikh na wanazuoni wengi ambao wameweza kuitangaza nchi pamoja na kuwasomesha vijana wengi wa ndani na nje ya Zanzibar.

Kama utataja majina ya masheikh hao ambao wamekuwa vinara wa kusomesha elimu hiyo ya dini, basi huwezi kumaliza bila ya kumtaja Al-marhum Maalim Idriss.

Kufahamika kwake huko hakutokani jambo lolote isipokuwa kazi yake ya ualimu ambapo alifanikiwa kutoa taaluma ya dini ya kiislamu kwa vijana wengi. Miongoni mwao hivi sasa ni masheikh wakubwa wa kutegemewa katika jamii yetu.

Kutokana na kuwa ni mwanazuoni maarufu visiwani humu, Makala hii imefanikiwa kutafuta historia yake alipoanzia katika maswala ya kidini, mpaka Mwenyezi Mungu alipomuhitaji kiumbe wake.

Katika kipindi kama hiki  cha mwezi mtukufu wa Ramadhan, marehemu alikuwa akisomoa hitma na utangulizi kabla ya kuanza kwa darsa katika msikiti Gofu.

Jina lake kamili ni Mohammed Idriss Mohammed Saleh Comorian, alizaliwa Septemba 17 mwaka 1934 akiwa mtoto wa kwanza katika familia ya watoto nane, wakiwem wanne wanaume na wanne wanawake.

Kama ilivyo kawaida ya watoto wengi wa dini ya kiislamu kuanza kusoma ilmu ya dini wakiwa wadogo, nae marehemu Maalim Idriss alikuwa miongoni mwa vijana hao.

Wazazi wa marehemu Maalim Idriss walimpeleka kujifunza ilmu ya Quraan  katika chuo cha Maalim Syd Mohammed Alawi Jamalily kilichopo katika mtaa wa Mchangani.

Mbali na kusoma katika chuo hicho, lakini wazee wa marehemu hawakuwa nyuma katika kumpa elimu zaidi ya dini, ambapo baada ya hapo pia walimpeleka kujifunza zaidi elimu ya dini kwa masheikh mbali mbali.

Miongoni mwa masheikh waliomsomesha Marehemu Maalim Idriss ni pamoja na marehemu Sheikh Kamus katika msikiti wa Mbuyuni, Sud Alawi maarufu ‘Sharifu mrefu’, Sheikh Abdallah Muadhini, Maalim Himid na masheikh mbali mbali ambao wote hao wameshafika mbele ya haki.

Baada ya hapo marehemu maalim Idriss alipelekwa skuli kwa ajili ya kujifunza elimu ya dunia, elimu hiyo aliipata katika skuli mbali mbali ikiwemo Shimoni, Kengeja Pemba na alimaliza elimu yake katika skuli ya Govt Boys Secondary School kwa sasa inajulika kwa jina Ben bella.

Mnamo mwaka 1950, Marehemu Maalim Idriss alijiunga na  masomo ya ualimu  katika chuo cha na mara baada ya kumaliza masomo hayo alianza kusomesha .

Marehemu alisomesha katika skuli mbali mbali za mjini na mashamba ikiwemo skuli ya Dole, ambapo baada ya miaka mingi ya kusomesha skuli maalim alistaafu kazi hiyo.

Mara baada ya kustaafu kusomesha, Marehemu alikuwa akijishughulisha na kazi ya kusomesha watoto wadogo elimu ya Quraan hapo katika mtaa wa Shangani katika msikiti wa Mambo Msiige.

Aidha kutokana na kazi hiyo ya kutoa elimu ya kitabu kitukufu kwa vijana wadogo,mwaka 1985 pia alikuwa Imamu wa msikiti huo huo wa Mambo msiige.

Lakini kutokana na kuwa na kazi ya kusomesha vijana pamoja na Imamu, lakini marehemu Maalim Idriss aliweza kuanzisha Jumuiya isiyokuwa ya Kiserikali (NGO) iliyokuwa ikijulikana kwa jina la Islamic Madrass Relief Organisatio (IMRO).

Jumuiya hiyo ambayo ilijikita zaidi katika kuvisaidia vyuo vya Quraan pamoja na kuwasaidia watoto mayatima kazi ambayo alifanikiwa kuifanya katika uhai wake na inaendelezwa mpaka hivi sasa.

Kutokana na kuona umuhimu wa kuuendeleza uislamu, marehemu alifungua Maktaba inayojulikana kwa jina la Islamic Museum hapo nyumbani kwake Shangani.

Kuanzishwa kwa maktaba hiyo kuliweza kuwasaidia watu wengi wakiwemo wageni na wenyeji waliokuwa wakifika katika maktaba hiyo kufaidika na kazi nzuri aliyoianzisha.

 Katika maktaba hiyo ambayo iliweza kuweka historia ya mambo mbali mbali ikiwemo ikiwemo historia ya Maulamaa mbali mbali wa Afrika Mashariki, Comoro, Oman na Yemen.

Lakini pia Marehemu alikuwa kiongozi wa Uradi wa Bausudani alishika nafasi hiyo hadi kufariki kwake, ambapo uradi huu alikabidhiwa kuusoma katika Masjid jibril kila siku ya Jumanne na Alhamis.

Marehemu Maalim Idriss aliweza kushika nyadhifa mbali mbali katika maswala ya kidini na hata katika vikundi mbali mbali na hata katika vikundi vya vijana wa Kiislamu.

Miongoni mwa nyadhifa hizo ni pamoja na Mwenyekiti wa Mwinyi Baraka Foundation, Mlezi katika chuo cha Madrasatul Munawar, mwanzilishi na Mwenyekiti wa bodi ya wadhamini ya ZOP inayoendesha kambi 40 za matibabu Unguja na Pemba.

Aidha makala hii ilibahatika kuzungumza na mmoja wa wanafunzi wake aliowasomesha na kumlea katika maadili mema,Mohammed Omar Al sheikh (Juda).

Juda alisema anamkumbuka marehem maalim Idriss kutokana na mambo mengi mema aliyomfanyia ikiwemo kumlea katika maadili mema yenye misingi ya kidini .

Pia alisema mbali na elimu hiyo, pia alimpeleka kwa marehemu maalim Kamus kupata mambo mengi ya kidini.

“Namshukuru sana na namkumbuka mrehemu maalim Idriss kwani amelea katika misingi mizuri ya kidini na ambayo ndio yalioweza kunisaidia kufikia hapa nilipo”.

“Pia marehemu ndie alienishika mkono mpaka msikiti wa Mbuyuni kwa marehemu Maalim Kamus kupata elimu ya kidini ambayo ndio inanisaidia mpaka leo, namuomba Mwenyezi Mungu amsameh makosa yake,” aliongezea.

Lakini mbali na Juda,pia nilipata nafasi ya kuzungumza na mwanafunzi wake Ally Hamdan,nae alimsifia mwalimu wake kutokana na kumpa elimu iliyo bora ambayo anaitumia.

“Kwa marehemu maalim Idriss nimeweza kupata mambo mengi sana ikiwemo kujifunza elimu ya quraan ambayo naitumia mpaka hivi sasa na mambo mbali mbali yanayohusu dini ya kiislamu,” alifafanua.

Marehemu Maalim Idriss atakumbukwa kwa mambo mengi sana ya kheri  aliyoyafanya na bado yanaendelezwa mpaka hivi sasa, ikiwemo kuhudhuria katika hadhara mbali mbali za kidini.

Pia kushiriki katika hauli za wanazuoni,kwani alikuwa hodari wa kutoa historia za maulamaa na kazi zao walizokuwa wakizifanya katika uhai wao.

Marehemu Maalim Idriss alikuwa akipenda watu, hodari katika kuwaelimisha vijana kujishughulisha na maswala ya kidini na hakuwa na ubaguzi kwa watu wa rika tofauti

Maalim Mohamed Idriss Mohamed Saleh amefariki akiwa na umri wa miaka 78 na maziko yake yalifanyika nyumbani kwa ndugu yake Profesa Saleh huko Kilimani na kuhudhuriwa na watu wengi sana wakiwemo masheikh, walimu na waumini wa dini ya kiislamu.

Mwenyezi Mungu amlaze mahali pema peponi ameen.